Štela bi vam pripovedati kak sme Božić i se te blagdane oko Božića slavili. Pripreme za Božić su počele još od Barbare 4.prosinca, pak je bil sveti Nikola. Onda su se čižmice dobre ščistile i na prozor dele i celu noć sme čekali ak nas ne san prevaril.

Jutre rane još bosi mam z postele sme bežali glejet kej nam je sveti Nikola v čižmu del. Tu su vam bile jabuke, naranđe, bomboni i tera čokolada, a pune put je i šiba bila morti v svetli paper zamotana. Tak sme se mi deca veselili svetom Nikoli. Onda na Luciju babica je šenicu posejala da se bu videle kakve bu lete i kak bu rodile žite. Do Božića je velika zrasla i pod bor sme ju deli. Pred Božić saki je imel svoj posel v hiži. Muži su drva priredili da se božićne dane nebu kalale, pak su krme više prenesli i kukurizu otrebili za svine i živinu raniti. Štalu ščistili i blage stimarili i kojne skefali. Sećam se staroga dedeka teri je kojnem grive česal i papke čistil, kola ometal i štalu i štagel.

Žene su hižu čistile, obluke i firunge prale, blazine natepale, pode ribale i z laguštem mazale. Peći i dimnaki su se morali ščistiti da bu za Božić tople fiže i da se ne kadele. Živina se klala, joreji čistili za kolače se se pomale zgotavlale. Na Badnjak su se guske presenice i paluvi (pogače) i kruvi pekli v krušne peći. Kokoš za juvu i ladetina od dromine se kuvala, mlinci na tabli su se pekli. Pura i gibanica se v role pekla, šape, meseci, i morti teri drugi kolači. Mi deca sme poskrivečki kolače mame krali dok nas ne ništi videl. No to se ne smele jer se na Badnjak same kramper na lupine jel i mrzli bažul. Kad je noć došla si sme se v hiže skupili i onda je tata z borem došel a deda je slamu fižu prinesel i ovak je rekel:˝ Dej vam Bog picekov, racekoc, žugekov, telekov, ždrebekov, pajcekov, dromne dečice, kruva, vina i Božega mira.˝ Si sme si na slamu klekli i Bogeku se pomolili, raspele kušnuli i onda sme išli bora kitit. Od se kuglic na boru najlepši su bili svetli bomboni.

Božićne pesme sme pevali, kitili bor i spremali se za polnočku. Peški se išle v pol noći na polnočku, sneg sme gazili i veselili se celem putem. Kad sme došli domom onda se ladetina jela, kobasi, presenica i poluvi, popareni z purećum mastjum i tek se pred jutre išle spat. Na Božić su se pesme pevale, jele i pile kej se za taj dan priredile, deca su bombone z bora trgala same je svetli paper ostal viseti na boru. Si su si dobri bili, ništi se te dane nije smel posvaditi niti grde misliti.

Drugi dan po Božiću na Štefanje, onda se već išle familije i kumom v posetu. Deca su se po slame valala iskala jabuke i joreje, a vani po snegu svece delala. Saki dan je Božić bil se do Tri Krala, kad se bor raskapal a negde je ostal okićen i do Svećnice. Na Ivanuša se slama van nosila z hiže i po vočkami kitila. Na Rodeša se išle na šibanje: mlade sneje i dekle su išle od hiže do hiže, a gazdarica ih je šibum po nogami oplela, a onda ih je počastila i nadelila.

Tak je došle i stare i nove lete, a to bum vam drugi put pripovedala. Sad bum same još rekla kak su se tri muži v selu oblekli u sveta Tri Krala i nosili tamjan, zlate i mirtu. To je bil znamen završetka Božićne dane, bor se raskitil taj dan i čekale se velečanoga za blagoslov.

                                                                                                           Nevenka Remenar