Par dan prije nek se išle trsje brat se se morale pririktati i zgotoviti. Japek i čača su sude, brente i lakomicu morali zapuhnuti.
Greštvalicu, prešu, košare i škare trsne prirediti. Kola je trebale pririktati, konje stimariti kad se čez klanjec ide s koberi pokriti. Morale se misliti da se z doma se zeme jer je nekomu i 10 kilometri do trsja bile iti.
A babica i mamek su gibanicu z joreji i kukuruzni kruv spekle, suve sire, špek i klobase narezale. Domaću puricu ili gusku priredile da nebi berači gladni bili. Kad se jutre rane još za kmice crne, se na kola zmetale i si sme na kola poseli. Japek je vojke v ruke zel i Vranka i Rička i mali enzek krajnih i si sme se v trsje uputili. Već se sunce visoke pokazale kad sme v trsje došli.
Najprije su muži sude i se druge s kol dole deli. Mamek i babica su fruštik priredile nek si težaki male prigriznu da nebuju gladni brat prešli.
Si teri su bili za brati su košare v ruke zeli i posla se prijeli. Jakši muži pak su brente nosili po redu i berače poslu priteravali. Japek je pri preše v pelnice bil pošel kontroleral. Da se nebi suve i gnile grozdje u beden nametale. Pak da se crne i bele ne pomesa skupoj i se druge kej sem vam ja već i pozabila. Muži su vam jeni k drugem celi dan v podrume hodočastili i vine i rakiju skušavali.
Žene su vam pesmu začele i čez celi breg i klanjec se pesma odsekud čula. Mi deca sme se razbežala igrat i do kmice nas nesu mogli najti. Kad se grozdje pobrale, najprije se dobre zgreštvale da pušti soka. U beden se pustila košara da se mošt prečisti da bi se mogel grabiti i s hamperi nalevati v lakomnicu s tere je mošt curel v lagev. To vam je tak fini slatki dišeći mošt tekel kakvega denes više ne. Kad je se grozdje pobrane bile pomale se išle domom.
I điha Vranka i điha Rička. I još denes čujem japeka svega. I bić kak puga i topot konjov i cuzeka kej hrže, i još navek se pesma čuje dok se s trsja vračame domom.
Nevenka Remenar
